ياسمين عز تدافع عن الفنان تامر حسني: “فيه ناس غيرانة من نجاحه

دافعت ياسمين عز عن الفنان تامر حسني بعد تعرضه لانتقادات من قبل بعض رواد مواقع التواصل الاجتماعي، بعد طرحه أحدث أعماله السينمائية وهو فيلم “تاج” والذي عرض بموسم أفلام عيد الأضحى الماضي.

وتحدثت “ياسمين” خلال برنامجها “كلام الناس” والذي يعرض على قناة “Mbc مصر” عن النجاح الذي حققه فيلم “تاج” بدور العرض السينمائي في مصر والوطن العربي وأن هناك قلة دائماً ما يهاجمون “تامر” وأعماله الفنية حتى قبل طرحها سواء عبر حساباته الرسمية على مواقع التواصل الاجتماعي أو عبر قناته الرسمية على “يوتيوب”. وعلقت “ياسمين” قائلة “الناس بقالها فترة بتتكلم عن نجم الجيل السوبر ستار تامر حسني أنا كنت بحاول إني أقاوم الموضوع وأقول دلوقتي هيخلص، مبيخلصوش يا جماعة هو ليه البعض كل ما تامر حسني ينزل بعمل جديد أو فيلم يكسر الدنيا ليه في شوية متربصين بيتربصوا بهذا النجم”.

واستكملت “وفيه شوية ناس قلة بتستخدم لجان إلكترونية بيهاجموا من غير ما يعرفوا الموضوع ونحارب الناجح ومن سنة كان ليه برضه فيلم وكسر الدنيا وكنت قاعدة نفس القاعدة دي وقولت كلام شبه اللي بقوله دلوقتي وعرفت أن الموضوع منظم، الراجل ده ناجح وفي بعض الأشخاص غيرانين من النجاح ده”.

وأضافت “كل ما ينزل حاجة قبل ما تبتدي تنزل في السينما ولا نشوف نجاحها يبتدوا يكسروا فيها يقللوا منها، تامر حسني عدى مرحلة إننا نقول عنده موهبة ولا معندوش خلصنا ده من زمان تامر حسني وهو نايم ممكن يألف لك أغنية وهو بياكل السلطة يألف لك كوبليه أو مقطع”.

وأنهت حديثها قائلة “لما يكون عندك نجم شامل ليه مبنصقفش للناجح اللي عندنا ونصقف للي بره ليه مبنصقفش للنجم المصري ابن بلدك بقالك 600 و700 سنة معندكش فنان شامل من أيام عبدالحليم حافظ جالك تامر حسني فنان شامل يغني ويمثل ويلحن ويؤلف ويخرج، عندك نجم شامل افرح بيه وأقول ده النجم المصري اللي مشرفني بره وجوه”.

يذكر أن تامر حسني أحيا حفلاً غنائياً يوم الجمعة الماضي بمهرجان العلمين بمدينة العلمين الجديدة، وأشعل الحفل بعدد من الاستعراضات إلى جانب تقديمه عدد من أغانيه التي طرحها مؤخراً منها أغنيتي “تاج وهرمون السعادة” ضمن أحداث فيلمه “تاج” ولاقت الأغاني تفاعلاً من قبل الجمهور الذين حرصوا على الحضور.