المذيعة مي حلمي ترفض مساعدة سيدة تطلب ملابس لابنها الجامعي: “علميه يشتغل”

تعرضت المذيعة مي حلمي، لانتقادات حادة من قبل رواد منصات التواصل الاجتماعي المختلفة، بعد انتشار فيديو لها شاركته مع متابعيها عبر “إنستجرام”، أبدت فيه انتقادها لسيدة طلبت منها مساعدة مالية لشراء ملابس لابنها في مرحلة الجامعة ليكون في نفس مستوى أصدقائه

وقالت في الفيديو: “اللي أنا هقوله دا مش جحود ولكن كلنا شقيانين بشكل أو بآخر بطريقة أو بأخرى، لما حد يبعتلي يقولي أنا قد مامتك نفسي في طلب ابني في الجامعة ونفسي يلبس زي أصحابه حلو، ممكن تساعديني ولو بطقم”، أنا شايفة ان دي رفاهية، والرفاهية دي عشان نعملها بنتعب جداً لسنين”.

وأضافت: “أنا كنت بشتغل وأنا في الجامعة ليه إنتي عاوزة تشحتي لابنك عشان يلبس كويس زي صحابه، ما تخليه يشتغل ويلبس من فلوسه لأني كنت شغالة وأنا في الجامعة، مع إن أهلي مش محتاجين التعاون ده، بس ليه أنا أخلي أمي تطلب طلب زي ده، ابنك مش أحسن مني، وكان عندي كرامة وعزة نفس، مش تحامل بس انتوا نسيتوا قوانين الدنيا، يعني انتي عايزاني أصرف على رفاهية ابنك بدل ما تقوليله اشتغل”

واختتمت قولها: “محدش بيساعد حد، وناس متغربة وشغالة، محدش بيساعد حد إلا في الحالات القصوى، المرض، الحوادث، الحاجات الكبيرة، وأنا شغالة من وأنا عندي 16 سنة، إنما أصرف على ابنك عشان يلبس، انتي المفروض تساعديه عشان يبقي راجل مش تشحتي له”

ودافعت المذيعة مي حلمي، عن وجهة نظرها وقالت: “فكرتني بأيام مُرة.. كلنا اتمرمطنا بشكل ما عشان نبقى كده، أنا عندي حاجات انتي أكيد متعرفهاش، وممكن أكون قعدت سنين عمري عشان أعمل وأوصل للي أنا فيه دلوقتي”

وأردفت: “فيه ناس في الجامعة متشحططة ومتغربة وبتدرس برضو، وشغالة في نفس الوقت، انتي ابنك أحسن من الناس المتغربة دي.. انتي المفروض تساعديه يبقي راجل عشان اللي تتجوزه متبتهدلش معاه، ويبقي قاعد في البيت وتخرج هي تصرف عليه، ومتعانيش زي ما ستات كتير بتعاني، فكرتيني بأيام مرة، وسودا، ليه أنا أصرف على واحد، علميه يشتغل”

وتعرضت “حلمي” لهجوم كبير، وكتبت إحدى المتابعات عبر “فيسبوك”: “مي حلمي بجد محتاجه دكتور نفسي يتطوع ويعالجها من النقص اللي عندها.. يعني واحدة طلبت منك مساعدة هاتعرفي تساعديها تمام مش هاتعرفي ماتطلعيش تكسري نفسها.. انتي سبحان الله عندك عدم قبول مرعب بجد”

واشتهرت مي حلمي بتقديم البرامج الخاصة بمجال الرياضة، وتقدم حاليًا برنامجها “صباحك عربي”، والذي تقوم من خلاله بالحديث عن جميع الموضوعات الرياضية الرائجة.